Þann 1. apríl síðast liðinn sást litmerkt sandlóa (♀) í Brittany í norður Frakklandi en samkvæmt litaröðuninni kemur hún frá Vestfjörðum. Þessi tiltekna sandlóa var fyrst merkt sem ungi 2. júlí 2004 í Dýrafirði.
Þremur árum síðar (2007) voru tvær fullorðnar sandlóur fangaðar á hreiðri við Sveinseyri í Tálknafirði og reyndist önnur þeirra vera með stálmerki, var þá hér komin unginn frá Dýrafirði. Sandlóan fékk litmerki og hefur hún einu sinni sést eftir þetta við Sveinseyri (19. júní 2011) og nú í Frakklandi. Eru þetta ansi góðar endurheimtur á litmerktum sandlóustofni í Tálknafirði eða 50%.

Sandlóur fara að sjást á næstu dögum á Vestfjörðum, helst er að sjá þær fyrstu við Sveinseyri í Tálknafirði og í Holtsodda í Önundarfirði en fleiri staðir koma einnig til greina. Nokkrar hafa sést á landinu og hefur t.d. ein litmerkt sandlóa sést við Stokkseyri en hún var merkt á sama svæði árið 2009.