Spói í Engidal. Mynd: Cristian Gallo.

Um þessar mundir eru flestar algengar fuglategundir mættar til Vestfjarða. Skógarþrösturinn (Turdus iliacus) er mættur en þann 22. mars sást til hans í garðinum a Bassastöðum í Steingrímsfirði. Heiðlóan (Pluvialis apricaria) er mætt en til hennar sást á Hólmavík þann 19. apríl. Til jarðraka (Limosa limosa) sást á Bassastöðum og í Önundarfirði en hrossagaukurinn (Gallinago gallinago) hefur sést á Bassastöðum, í Súðavík og á Flateyri. Til sandlóu (Charadrius hiaticula) sást í botni Hestfjarða þann 30. apríl. Spói (Numenius phaeopus) sást sama dag í Engidal. Spói er algengur varpfugl á Íslandi. Hann heldur sig í Vestur-Afríku yfir vetrartímann og eru dæmi um að hann hafi flogið frá Íslandi til Afríku án þess að stoppa á leiðinni.

Nú erum við að bíða eftir kríunni en hún ætti að vera á leiðinni frá Suður-Afríku og Suðurskautslandinu þar sem hún dvelur frá u.þ.b. september til maí.

Við þökkum þeim fuglaáhugamönnum sem hafa látið vita af þeim fuglum sem þeir hafa fylgst með og sent upplýsingar á netfangið svartfugl@snerpa.is.